كرمنا رموز قومية ووطنية والتكاتف سر الاستمرارية
نطمح ان يصبح الرعيل الاول كيان اجتماعي ثقافي رياضي يجمع السودانيين تحت بوتقة واحدة ينمي ويثقف ويطور النشء
تمرين الرعيل يوم الثلاثاء من اكثر التجمعات للجيل القديم علي المستطيل الاخضر مختلطاً بجيل الشباب لضمان الاستمرارية
قبل اكثر من 30 سنة كانت ضربة البداية بإنشاء ثلاث فرق ما ذالت موجودة حتى الان.
التقاه : الهادي بشرى
# نبدأ أول شيء نتكلم عن الرعيل الأول البداية، كيف تكون تجمع قدامى اللاعبين المسمي بالرعيل الاول؟
من أسس الرعيل وهل المؤسسين حالياً موجودين مع الناس هذة الكوكبة النيرة من اللاعبين الكبار مقاماً وسناً؟
# الرعيل الأول انبثق من القدامى، اللعيبة اللي كانوا موجودين في منطقة خميس مشيط، وتقريباً من سنة 1980 أو ما قبلها بشوية، 79، 78. واسسنا نشاط رياضي وبنلعب مع بعضنا، وفي خلال الفترة دي تكونت فرق وبمرور الفترة الزمنية الطويلة دي، الناس تقدمت في السن، بالذات قدامى اللعيبة، وأصبحوا قاب قوسين أو أدنى من الحضور اللي كان مستمر زمان. وقبل 3 سنين ونص، قلنا نجمع الناس ديل ونتلاقى، على الأقل ملتقى يكون لينا إحنا القدامى اللعيبة، وبدينا في التمارين.
كانت أتذكر في أيام كويسة، وفجأة كده جه البرد والناس تاني ما اتجمعت. وأخيراً، الآن لينا يمكن فترة بتاعة أكثر من سنة بقت التمارين منتظمة، والمنطقة برضه زخرت بالعديد من المواهب الشابة، وبرضه المتقدمين في العمر، اللي دخلوا على المنطقة لظروف الحرب، والناس جات زيارات كثيرة، وتكونت فرق كثيرة طبعاً دي في الرابطة.
وفي الرعيل الأول كنا النواة اللي انبثقت منها كل هذا الجمال وكل هذه الفرق، ومستمرين الآن في تماريننا دي بانتظام. ومن ضمن الإخوة القدامى:
* محمد علي مدني (المستشار).
* الباقر.
* وأولادنا اللي اتولدوا ونشأوا هنا معانا من الزمن داك، ناس مرتضى، وإياد، ومحمد، ومتوكل، ديل كانوا معانا ومتواصلين ومحمد عوض الله، ديل مواليد هنا كلهم.
بالإضافة للعيبة آخرين برضه بقوا داعميننا ومعانا، بالإضافة للجدد، ناس حضروا للمنطقة بغرض العمل، وناس بغرض الزيارة، و التيم بقى كبير، ودرجنا وعملنا أشياء جميلة تكاد تكون لأول مرة، اللي هي *التكريمات* بالنسبة للرموز الرياضية، والثقافية، والاجتماعية.
كان كل تمرين بنكرم شخص، ومدربين، وبرضه ناس ليهم باع طويل تواجدوا في المنطقة وفي الأكاديميات، كلهم تم تكريمهم. وهو شي مهمة جداً وممكن تكون بالنسبة للاعبين الكانوا معانا زمان والآن رجعوا السودان نهائي، وفي مصر، وفي بلاد تانية برضه كرمناهم، حتى هم ما موجودين لكن عملنا لهم الدروع بتاعتهم ورسلناها ليهم وكده.
ولسه باب التكريمات فاتح لكل مناسبة، حتى الفرق اللي في الرابطة الرياضية من الشباب اللي حازت على الكؤوس والبطولات السودانية والخارجية السعودية في الدورات برضه كرمناهم، ودي حاجة جميلة جداً. وتمريننا تعليمي، في كل تمرين بيحمل اسم له مدلول، زي “النظرة الثاقبة”، زي “روح المشاركة” (الآن تمريننا ده روح المشاركة)، و”الانشداه”، وبنشرح الروح والمشاركات والأشياء دي بنغرسها في الناس وبيستفيدوا منها ، ودي حاجة مهمة جداً بنتميز بيها وكل الناس دي ليها احترام شديد لفريق الرعيل الأول.
# أبرز من كرمهم الرعيل الأول؟
# والله العدد كبير و القائمة تطول، لكن أبرز المكرمين الأستاذ الهادي بشرى الإعلامي، والمستشار القانوني محمد علي مدني، والمستشار القانوني العركي، ومن قدامى اللاعبين عمر العجو (كوتش)، والنور قماش.
وأيضاً درجنا إلى الأسر العريقة، أسرة رحمة الله عبد الوهاب (اللي هو والد مرتضى)، وبكر صالح الله يشفيه لأن هو طريح بالمستشفى. وبالإضافة لآخرين ما موجودين زي عبد الله الباقر، وزي وليد الهوشان من اللعيبة الكان ليهم صولات وجولات في الميادين هنا.
# كلمنا عن اللاعبين الانضموا للرعيل الأول أو لعبوا حتى لو مشاركة واحدة وكانوا لاعبين زمان في الأندية الكبيرة؟
# والله شرفونا عدد كبيرة من أميز اللاعبين المعروفين منهم علي سبيل الذكر الكابتن يوسف الصيني، والكابتن ناني. يوسف الصيني طبعاً كان لاعب في المريخ وفي الفريق القومي، وبرضه الكابتن خالد أحمد المصطفى بدأ معانا في التمارين من بدايتها (الرعيل الأول) كان في المريخ، وكابتن المريخ إبراهومة.
كان جانا مع المريخ زمان سنة 98، 97، فكان شاركوا في الدورة بتاعة أبها، حتى خالد المصطفى كان لاعب الوقت داك. وعندك الكابتن ناني كان في الأهلي الخرطوم اللي هو الخرطوم الوطني، وبالإضافة لـ زاكي الدين لِيه صولات وجولات في عدد من الأندية وكثيرين والله، الواحد ما يقدر يستحضرهم في عجالة كده.
# عدد الأشخاص الكانو مؤسسين ومؤثرين ومن أين جاء إسم الرعيل الاول اذكر صاحب الفكرة .؟
# بدينا زي ما قلت ليك قدامى اللاعبين، كنا اتنين، تلاتة مع بعض، وأعلنا عن تمارين طبعاً متواصلين عندنا جروب فريق الإخوة.. ده طبعاً فريق عريق، شيخ الفرق السودانية في المنطقة، ولعبنا فيه وتناقشنا في النقطة دي، بالإضافة برضه في فريق الوطن وأصدقاء كسلا، ده من الفرق العريقة، بالإضافة للموج الأزرق، ديل ناس قدام وفرق عريقة.
تواصلنا مع بعضنا وقلنا يا جماعة نحن الناس الكبار دايرين نلتقي عشان نرتقي، ده كان شعار لأحد التمارين،
فوافقوا علي الفكره والهدف زي ما قلت هي تمرين ومقابلة، الناس مشغولة ما بتلقى فرصة تتقابل في خلال الأسبوع، فخصصنا يوم الثلاثاء باختيار وموافقة الجميع إنه نلتقي فيه دائماً. حتى الناس الما قادرة تلعب، تقدمت بيهم السن بيجوا، أهو شايف الشاي والقهوة والحاجات اللي زي دي، يتقابلوا. وبعد ما استمرينا والناس تسدد اشتراكاتها وبقت الأمور ماشية، بقينا نخصص جزء من الميزانية للتكريمات، وفي رعاة كرمناهم زي شركة تاركو، عملنا لهم تكريم قبل كدة
# هل في اعتقادك ان فكرة الرعيل الأول تظل بنفس المسمي والشروط ام ان هنالك مستجدات في الأفق البعيد ..؟
# فكرة الرعيل الاول في تتطور إن شاء الله، هو طبعاً عبارة عن مؤسسة أو مجموعة سفراء، زي ما قال أخونا الأستاذ معاوية عابدين لأنه فوجئ بالالتفاف بتاع الناس والتكريمات، وكرمناه هو نفسه. فـ عندنا أشياء أفكار كثيرة جداً جداً تكون اجتماعية ونتفقد أحوال بعضنا، وبنشوف الناس المتعثرين، بنشوف الناس الما شغالين، الناس بتبحث كلهم. الرؤية تكون واسعة، يعني عيون تكون هنا، يلقوا لك شغل مثلاً إمكانياتنا بقت كويسة الناس بتساعد الناس بتبرعات بحاجات عينية، بالإضافة لإكرام الموتى برضه الناس في الرعيل الأول ليهم مشاركات تقريباً في الدفن وفي غسل الجثمان وفي الأشياء دي.
# بخبراتكم في تسهيل الإجراءات ومعارفكم في القطاعات المختلفة مساهمتكم كبيرة في اكرام الموتى ..؟
# بالضبط، يسهلوا في الأوراق وبيقوموا بالدفن والحفر وتجهيز المعدات، وعندنا إكرام الميت ومجموعة من الإخوة القدامى بيدفعوا اشتراكات وبيحفروا المقابر والأشياء دي.
# هل يمكن ان يتحول الرعيل الاول لمؤسسة رسمية اونادي أو مركز؟
#والله إن شاء الله نحن بصدد إنه يكون مركز وحتى كمان مركز ثقافي وتعليمي، إذا وجدنا الدار، لكن طبعاً هنا الدواعي الأمنية بتمنع التجمعات، لكن الرعيل قبل كده أجرنا دار تجمعنا فيها أسرياً، ومعنا المعلمين و المهندسين و الأطباء يعني ممكن تاسيس فصول تقوية للطلاب في إنجليزي في الرياضيات في الأشياء اللي زي دي. و الجمعيات النسائية والشباب نحتويهم ويكونوا في بوتقة واحدة تحت اسم الرعيل الأول، ونقدر إن شاء الله إذا توفرت الإمكانيات لقدام أفكارنا كثيرة جداً جداً في بلورة هذه النشاطات
#يعني النادي يكون ثقافي رياضي اجتماعي؟
#نعم، نعم، نعم، نادي ثقافي رياضي اجتماعي، وزي ما قلت ليك جلسات في المساء وممكن تكون فصول محو أمية فصول تقوية فصول حاجات زي دي، بالإضافة إلى إنه الشباب وأولادنا والناس اللي في الأعمار بتاعت المراهقة يكونوا موجودين تحت عيوننا يعني في هذا النادي يستفيدوا من ألعاب أنشطة، جمعيات ثقافية، مسرح، تمثيل، موسيقى، شعر، أشياء متعددة، ثقافية اجتماعية إن شاء الله.
#طيب، رسالة للجيل الجاي مثلاً الذي سوف يستلم الراية، من جيل الرعيل الأول؟
نحن في الرعيل الاول بنرحب وبنلتقط من الشباب لأنه طبعاً هي تسليم راية من جيل (Generation) إلى جيل، وإحنا بندعمهم بخبراتنا وبنكون جنبهم حولهم، وهم اللي بيتحركوا. و أنا أتمنى الشباب كلهم يكونوا في مظلة واحدة ويحافظوا على الإرث ده، ونمشي لقدام إن شاء الله دائماً بالتوجيهات وبالرعاية التامة
#وإن شاء الله تستمر التمارين برضه..؟
#التمارين يشاركونا فيها، الرعيل الأول ما لازم يكون الناس كبار، يعني لو تلاحظ معانا شباب بياخدوا فرصتهم على أساس إنه يستلم شوية شوية ويكون فاهم الوضع، وإن شاء الله بيقودوا الدفة لقدام في المستقبل إن شاء الله.
#كلمة أخيرة للجالية عموماً وعمالقة الرعيل الأول؟
#أتمنى الاستمرارية، لأنه الاستمرارية هي أهم حاجة، وأتمنى توافق الناس مع بعضها البعض، تكون في روح تتقبل بعضها، تتقبل وجهات النظر، تناقش بموضوعية، ويتعاونوا مع بعضهم للشيء الأفضل دائماً .
# الريح مهدي جبريل محمد، النشأة والميلاد أم درمان حي العرب 2 مربع 5
عن المؤلف
